பெண் பார்த்து கொடுக்கவில்லை: மேட்ரிமோனி நிறுவனத்திற்கு அபராதம்
திருமணத்திற்கு வரன் பார்த்து தராத மேட்ரிமோனி நிறுவனத்திற்கு நீதிமன்றம் அபராதம் விதித்துள்ள சம்பவம் இந்தியாவில் இடம்பெற்றுள்ளது.
தற்போதைய காலகட்டத்தில் பெரும்பாலானோர் மேட்ரிமோனி மூலமாகவே தங்களது பிள்ளைகளுக்கு வரன் பார்க்கின்றனர். எனிலும் சில மேட்ரிமோனி நிறுவனங்கள் வாடிக்கையாளர்களிம் பெரும் தொகை அறவிடுவதுடன் அவர்களை ஏமாற்றிவிடும் சந்தர்ப்பங்களும் உள்ளன.
இந்நிலையில் கர்நாடக மாநிலம் பெங்களூரை சேர்ந்தவர் விஜய் குமார். இவர் தனது மகன் பாலாஜியின் திருமணம் செய்ய முடிவு செய்து, பெண் தேடுவதற்கு அங்குள்ள குறித்த மேட்ரிமோனி நிறுவனத்தை கடந்த மார்ச் 17 ஆம் திகதி அணுகியுள்ளார்.
அதற்கு இந்திய ரூபாயில் 30,000 செலுத்துமாறு மேட்ரிமோனி நிறுவனம் கூறியுள்ளது. இதனையடுத்து 30,000 செலுத்திய விஜய் குமார் தனது மகனின் புகைப்படம் மற்றும் தேவையான அனைத்து ஆவணங்களையும் வழங்கியுள்ளார்.
45 நாட்களில் பெண் பார்த்து தருவதாக உறுதியளித்த நிறுவனம், எந்த வரனும் பார்த்துக்கொடுக்காததால், பலமுறை விஜய குமார் அலுவலகத்திற்கு நேரில் சென்று விசாரித்தபோது சில நாள் காத்திருக்கும்படி தெரிவித்துள்ளனர்.
இதனையடுத்து பொறுமையிழந்த விஜய குமார், ஏப்ரல் 30 ஆம் திகதி, அலுவலகத்திற்குச் சென்று தனது பணத்தைத் திரும்ப தருமாறு கேட்டுள்ளார். இந்நிலையில் அங்கு பணிபுரிபவர்கள் பணத்தை திரும்ப தர மறுத்ததோடு, அவரை அவதூறாக பேசி மன உளைச்சலுக்கு ஆளாக்கியுள்ளனர்.
அதனால் வேதனையடைந்த விஜயகுமார், மே 9 அன்று அந்த மேட்ரிமோனி நிறுவனத்திற்கு நோட்டீஸ் அனுப்பியபோது அதற்கும் பதிலளிக்காத நிலையில், நீதிமன்றத்தை நாடியுள்ளார்.
வழக்கை விசாரித்த நுகர்வோர் நீதிமன்றம், அவர் செலுத்திய 30,000, சேவை குறைபாட்டிற்காக ரூ.20,000, மன உளைச்சல் ஏற்படுத்தியதற்கு ரூ.5,000, வழக்கு செலவு ரூ.5000 என மொத்தம் ரூ.60,000 விஜயகுமாருக்கு செலுத்த உத்தரவிட்டதாக தெரிவிக்கபப்டுகின்றது.
மேலும் பல செய்திகளை அறிந்து கொள்ள மின்னல்24 இணையத்தளத்தை பார்வையிடவும்
