இந்தோனேசியாவின் பாலி தீவில் ஆஸ்திரேலியாவைச் சேர்ந்த 56 வயதான ஆண் ஒருவரும் அவரது இரண்டு சிறு குழந்தைகளும் வீட்டுக்குள் சடலமாக மீட்கப்பட்ட சம்பவம் தொடர்பில் பொலிஸார் விசாரணைகளை ஆரம்பித்துள்ளனர். மூவரின் மரணமும் சந்தேகத்திற்கிடமானதாக இருப்பதால், சம்பவம் தொடர்பான அனைத்து கோணங்களிலும் விசாரணை முன்னெடுக்கப்பட்டு வருகிறது.
குடா (Kuta) பகுதியில் உள்ள பங்களா ஒன்றிலேயே இந்தச் சம்பவம் இடம்பெற்றுள்ளது. உயிரிழந்த ஆண் மேற்கு அவுஸ்திரேலியாவின் ஃப்ரீமன்டில் பகுதியைச் சேர்ந்த டேமியன் ஜோன் ஷா என அடையாளம் காணப்பட்டுள்ளார். அவரது 6 வயது மகனும் 4 வயது மகளும் அவருடன் சடலமாக மீட்கப்பட்டுள்ளனர். குழந்தைகள் இருவரும் இந்தோனேசிய குடியுரிமையையும் கொண்டிருந்ததாக பொலிஸார் தெரிவித்துள்ளனர்.
குழந்தைகளின் தாய் சம்பவம் இடம்பெற்றபோது ஜகார்த்தாவில் இருந்ததாக தெரிவிக்கப்பட்டுள்ளது. தொலைபேசி உரையாடலின்போது குழந்தைகளில் ஒருவரின் அழுகைச் சத்தத்தைக் கேட்டதையடுத்து, அவர் குடும்பத்தினரை தொடர்புகொள்ள முயன்றுள்ளார். ஆனால் தொடர்ந்து அவர்களைத் தொடர்புகொள்ள முடியாததால், அருகிலிருந்த அயலவரிடம் வீட்டுக்குச் சென்று நிலைமையைப் பார்க்குமாறு கேட்டுக்கொண்டுள்ளார்.
இதையடுத்து அயலவர்கள் மற்றும் வீட்டின் உரிமையாளர் அங்கு சென்று பார்த்தபோது, உள்ளே இருந்து எந்தவிதமான பதிலும் கிடைக்கவில்லை. பின்னர் கதவு உடைக்கப்பட்டு திறக்கப்பட்டபோது மூவரும் சடலமாகக் காணப்பட்டனர். சம்பவ இடத்துக்குச் சென்ற பொலிஸார் தடயவியல் ஆய்வு மற்றும் ஆரம்பகட்ட விசாரணைகளை மேற்கொண்டனர்.
ஆரம்பகட்ட வெளிப்புறப் பரிசோதனையில், குழந்தைகள் இருவரும் வன்முறைக்கு இலக்காகி உயிரிழந்திருக்கலாம் என்றும், அவர்களின் தந்தை தூக்கிட்டு உயிரிழந்திருக்கலாம் என்றும் பொலிஸார் சந்தேகிக்கின்றனர். இதனால் இந்தச் சம்பவம் கொலை மற்றும் தற்கொலை சம்பவமாக இருக்கலாம் என்ற கோணத்திலும் விசாரணை இடம்பெற்று வருகிறது. எனினும், மரணத்திற்கான இறுதியான காரணம் இதுவரை உறுதிப்படுத்தப்படவில்லை.
சம்பவம் தொடர்பான CCTV காட்சிகள் ஆய்வு செய்யப்பட்டு வருவதுடன், உயிரிழந்தவர்களின் குடும்பத்தினர் உள்ளிட்ட சாட்சிகளிடமும் வாக்குமூலங்கள் பெறப்பட்டு வருகின்றன. குழந்தைகளின் தாயாரிடமும் பொலிஸார் தகவல்களைப் பெற்றுள்ளனர். மேலதிக பிரேதப் பரிசோதனைகள் மற்றும் தடயவியல் விசாரணைகளின் பின்னரே மரணங்களுக்கான முழுமையான காரணம் தெரியவரும் என தெரிவிக்கப்பட்டுள்ளது.
இந்த சம்பவம் தொடர்பில் ஆஸ்திரேலிய வெளிவிவகார மற்றும் வர்த்தக திணைக்களம் உயிரிழந்தவர்களின் குடும்பத்தினருக்கு தூதரக உதவிகளை வழங்கி வருவதாக தெரிவித்துள்ளது. மேற்கு ஆஸ்திரேலிய முதல்வர் ரோஜர் குக் இந்த சம்பவத்தை மிகவும் அதிர்ச்சியளிக்கும் துயரச் சம்பவம் எனக் குறிப்பிட்டு, குடும்பத்தினருக்கு இரங்கல் தெரிவித்துள்ளார்.
