-நானுஓயா நிருபர்-
நாவலப்பிட்டி பஸ்பாகே கோரள பிரதேச செயலகத்தின் சேமிப்பு அறையில் வெடிகுண்டு இருப்பதாக அலுவலகத்தின் பொதுவான மின்னஞ்சல் முகவரிக்கு வந்த செய்தியைத் தொடர்ந்து இன்று பிரதேச செயலக வளாகம், சேமிப்பு அறை உட்பட அனைத்து பகுதிகளுக்கு சிறப்பு தேடுதல் நடவடிக்கை தொடங்கப்பட்டுள்ளது.
நாவலப்பிட்டி பஸ்பாகே கோரள பிரதேச செயலக செயலாளர் திருமதி ரம்யா ஜெயசுந்தரவுக்கு வெளிநாட்டிலிருந்து வந்த ஒரு கூடாரத்தில் வெடிகுண்டு இருப்பதாகவும், அது இன்று பிற்பகல் 2:00 மணிக்கு வெடிக்கும் என்றும் அனுப்பப்பட்ட மின்னஞ்சல் செய்தியைத் தொடர்ந்து களஞ்சிய அறை உட்பட பிரதேச செயலக வளாகம் அவசர சோதனைக்கு உட்படுத்தப்பட்டது.
உடனடியாகச் செயல்பட்ட பிரதேச செயலாளர், பிரதேச செயலக ஊழியர்களையும் பிரதேச செயலகத்தில் இருந்த மக்களையும் வெளியேற்றி, அது குறித்து பாதுகாப்புப் படையினருக்குத் தகவல் தெரிவித்துள்ளார்.
இதனைத் தொடந்து நாவலப்பிட்டி காவல்நிலைய உத்தியோகத்தர்கள், காவல்துறையினர் மோப்ப நாய் பிரிவு, காவல்துறை விசேட அதிரடிப்படையின் குண்டு செயலிழக்கச் செய்யும் பிரிவு மற்றும் இராணுவத்தின் குண்டு செயலிழக்கச் செய்யும் பிரிவினர் வரவழைக்கப்பட்டு பாரிய தேடுதல் நடவடிக்கை முன்னெடுக்கப்பட்டது இருந்தும் இதுவரை சந்தேகத்திற்கிடமான வெடிபொருட்கள் எதுவும் கண்டெடுக்கப்படவில்லை.
உடனடியாக சம்பவ இடத்திற்கு வந்த கண்டி மாவட்ட நாடாளுமன்ற உறுப்பினர் துஷாரி ஜெயசிங்க, பிரதேச செயலகத்திற்கு கிடைத்த மின்னஞ்சல் செய்தியின் அடிப்படையில் பிரதேச செயலக வளாகம் ஆய்வு செய்யப்பட்டதாக இங்கு சந்தேகத்திற்கிடமான வெடிபொருட்கள் எதுவும் கண்டெடுக்கப்படவில்லை என தெரிவித்தார்.
