நண்பரை 108 முறை கத்தியால் குத்தி கொலை செய்த பெண் : 100 மணி நேர சமூக சேவை செய்ய உத்தரவிட்ட நீதிபதி

போதைப்பழக்கத்தால் நண்பரை 108 முறை கத்தியால் குத்தி கொலை செய்த பெண்ணுக்கு 100 மணி நேர சமூக சேவை செய்ய உத்தரவிட்ட நீதிபதி.

கலிபோர்னியா மாநிலத்தை சேர்ந்தபெண் பிரின் ஸ்பெசர் (Bryn Spejcher). பிரின் (33 வயது) இவருடைய ஆண் நண்பர் சாட் ஒமேலியா (Chad O’Melia) (26-வயது).

பிரின் போதை மருந்து உட்கொள்ளும் பழக்கம் உள்ளவர்.

2018 மே மாதம், தனது ஆண் நண்பர் ஒமேலியாவை சந்திக்க பிரின் சென்றார். அப்போது பிரின் மரிஜுவானா எனும் போதை பொருளை பயன்படுத்தினார் இதனால் அதில் அவர் தனது சுயகட்டுப்பாட்டை இழந்தார்.

அந்நிலையில் அவருக்கு ஒமேலியாவிற்கும் வாக்குவாதம் ஏற்பட்டது. கோபத்திலும், போதை மருந்தின் மயக்கத்திலும், என்ன செய்கிறோம் என்பதை அறியாத பிரின், ஒமேலியாவை  கத்தியால் 108 முறை கத்தியால் குத்தினார்.

இதில் அந்த இடத்திலேயே பரிதாபமாக உயிரிழந்தார் ஒமேலியா.

தகவல் தெரிவிக்கப்பட்டு பொலிஸார் சம்பவ இடத்திற்கு விரைந்து வந்த போது உடல் முழுவதும் ரத்தத்துடன், கையில் கத்தியை பிடித்தவாறு, அழுது கொண்டே இருந்தார் பிரின்.

பொலிஸார் அவரை பிடிக்க முற்பட்ட போது தனது கையில் இருந்த கத்தியால் தன் கழுத்தில் குத்தி தற்கொலைக்கு முயன்றார். உடனடியாக பொலிஸ் அதிகாரிகள் அவரை காப்பாற்றி மருத்துவமனைக்கு அழைத்து சென்றனர்.

ஒமேலியாவை மட்டுமின்றி தனது நாயையும் குத்தி கொன்றார் பிரின் என்பதை பொலிஸார் கண்டுபிடித்தனர்.

நீண்ட காலம் நடைபெற்ற இந்த வழக்கு விசாரணையில்,  பிரின் தரப்பு வழக்கறிஞர்கள் போதை மருந்தின் தாக்கத்தில் என்ன செய்கிறோம் என்பதை அறியாமல் அவர் கொலை செய்து விட்டதாக வாதிட்டனர்.

இந்நிலையில், வென்சுரா கவுன்டி நீதிமன்ற நீதிபதி டேவிட் வோர்லி, பிரின் தனது செயலிலும் எண்ணத்திலும் கட்டுப்பாடே இல்லாமல் இந்த கொலையை செய்துள்ளதால் அவருக்கு சிறை தண்டனை வழங்காமல், 2 வருட ‘ப்ரொபேஷன்’ (ஒரு நன்னடத்தை கண்காணிப்பு அதிகாரியின் மேற்பார்வையில் வாழுதல்) மற்றும் 100 மணி நேரம் சமூக சேவை புரியவும் உத்தரவிட்டு தீர்ப்பளித்தார்.