அமெரிக்க ஜனாதிபதி டொனால்ட் ட்ரம்ப் முன்மொழிந்த ‘கோல்ட் கார்ட்’ விசா திட்டத்திற்கான பதிவு பணிகள் ஒரு வாரத்தில் ஆரம்பமாகும் என அமெரிக்க வர்த்தக செயலாளர் ஹாவர்டு லூட்னிக் அறிவித்துள்ளார்.
இந்த திட்டத்தின் கீழ், ஒரு வெளிநாட்டவர் 5 மில்லியன் டொலர் முதலீடு செய்தால், அவருக்கு Green Card, பின்னர் அமெரிக்கக் குடியுரிமை பெறும் பாதை உருவாகும்.
இது தற்போது நடைமுறையில் உள்ள EB-5 திட்டத்தை மாற்றும் வகையில் வடிவமைக்கப்பட்டுள்ளது.அதில் முதலீடு தொகை $900,000 முதல் $1.8 மில்லியன் வரை இருந்தது.
TrumpCard.gov என்ற அதிகாரப்பூர்வ இணையதளம் விரைவில் செயல்படவுள்ளது. இத்திட்டம் மூலமாக மத்திய அரசுக்கு பாரிய வருமானம் கிடைக்கும் எனவும், 200,000 பேர் வாங்கினாலும் அது 1 டிரில்லியன் டொலர் வருமானம் எனவும் லூட்னிக் குறிப்பிட்டுள்ளார்.
இது குறித்து, சட்டவியலாளர்கள் சிலர் மொத்தமாக நடைமுறைப்படுத்துவதற்கு காங்கிரஸின் அனுமதி தேவைப்படும் என எச்சரிக்கின்றனர். ஆனாலும் உலக அளவில் பல செல்வந்தர்கள் இதில் ஆர்வம் காட்டுவதாக தகவல்கள் தெரிவிக்கின்றன.
