டிட்வா சூறாவளியினால் பாதிக்கப்பட்டவர்களில் 88 சதவீதமானோர், வீடுகளைச் சுத்தப்படுத்துவதற்காக அரசாங்கத்தினால் வழங்கப்படும் 25,000 ரூபாய் கொடுப்பனவைப் பெற்றுக் கொண்டுள்ளதாக பாதுகாப்பு அமைச்சின் அனர்த்த முகாமைத்துவ பிரிவின் மேலதிக செயலாளர் கே.ஜி.தர்மதிலக்க தெரிவித்துள்ளார்.
பாதிக்கப்பட்ட சமூகங்களின் வாழ்வாதாரத்தை மேம்படுத்தவும், அவர்களை மீண்டும் இயல்பு நிலைக்குக் கொண்டு வரவும் அரசாங்கத்தினால் முன்னெடுக்கப்படும் பரந்த அளவிலான மறுசீரமைப்புத் திட்டத்தின் ஒரு பகுதியாக இந்தக் கொடுப்பனவுகள் வழங்கப்படுவதாக தெரிவிக்கப்பட்டுள்ளது.
பாதிக்கப்பட்ட பகுதிகளில் உள்ள பாடசாலை மாணவர்களின் கல்வி நடவடிக்கைகளுக்கு ஆதரவாக, மாணவர் ஒருவருக்கு தலா 15,000 ரூபாய் வீதம் வழங்க அரசாங்கம் நடவடிக்கை எடுத்துள்ளது.
சூறாவளியினால் வீடுகள் பகுதி அளவில் சேதமடைந்த குடும்பங்களுக்கு தலா 5,00,000 ரூபாய் (5 இலட்சம்) வழங்கப்படவுள்ளது.
தமது வீடுகளையும் காணிகளையும் முழுமையாக இழந்த குடும்பங்களுக்கு தலா 1,000,000 ரூபாய் (10 இலட்சம்) இழப்பீடாக வழங்கப்படவுள்ளது.
இந்த நிதி உதவிகள் அனைத்தும் அதிகாரிகளின் நேரடி மேற்பார்வையின் கீழ் விநியோகிக்கப்பட்டு வருவதாக அந்த அறிக்கையில் மேலும் தெரிவிக்கப்பட்டுள்ளது.
