‘சிலோன் டீ’ ஏற்றுமதியாளர்களுக்கு இலங்கை தேயிலை சபையின் 50% வீத வர்த்தகக் கண்காட்சி சலுகைத் திட்டத்திற்கு அமைச்சரவை அங்கீகாரம் வழங்கியுள்ளது.
இன்று செவ்வாய்க்கிழமை இடம்பெற்ற அமைச்சரவை முடிவுகளை அறிவிக்கும் போதே அமைச்சரவை பேச்சாளர் நளிந்த ஜெயதிஸ்ஸ இதனைத் தெரிவித்துள்ளார்.
இலங்கை தேயிலை ஏற்றுமதியாளர்களுக்கு புதிய சர்வதேச கொள்வனவாளர்களை கண்டறிதல் மற்றும் உலகளாவிய ரீதியில் ‘சிலோன் டீ’ வர்த்தக நாமத்தை ஊக்குவிப்பதற்கான வசதிகள் வழங்கப்படவுள்ளன.
இலங்கை தேயிலை ஏற்றுமதியாளர்களுக்கான 50% வீத வர்த்தகக் கண்காட்சி சலுகைத் திட்டம் 2015 ஆம் ஆண்டு தொடக்கம் இலங்கை தேயிலை சபையால் நடைமுறைப்படுத்தப்பட்டுள்ளது.
அதற்கமைய, குறித்த வர்த்தகக் கண்காட்சி முன்மொழிவுத்திட்டத்தை தொடர்ச்சியாக மேற்கொண்டு செல்வதற்காக பெருந்தோட்ட மற்றும் சமூக உட்கட்டமைப்பு வசதிகள் அமைச்சர் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.
