அமெரிக்க ஜனாதிபதி டொனால்ட் ட்ரம்ப், சாகோஸ் தீவுகளின் (Chagos Islands) இறையாண்மையை மொரிஷியஸிடம் ஒப்படைக்கும் ஐக்கிய இராச்சியத்தின் திட்டத்தைக் கடுமையாக விமர்சித்துள்ளார்.
இந்த நடவடிக்கையை “மிகப்பெரிய முட்டாள்தனம்” (An act of GREAT STUPIDITY) என்று அவர் குறிப்பிட்டுள்ளார்.
இந்தியப் பெருங்கடலில் அமைந்துள்ள சாகோஸ் தீவுக்கூட்டத்தின் இறையாண்மையை மொரிஷியஸிடம் மாற்றும் ஒப்பந்தம் குறித்து கருத்துத் தெரிவிக்கும் போதே ட்ரம்ப் இவ்வாறு குறிப்பிட்டுள்ளார்.
சர்வதேச சட்டத் தீர்ப்புகளின்படி, மொரிஷியஸ் சுதந்திரம் அடைவதற்கு முன்னதாகவே பிரித்தானியா இந்தத் தீவுகளைச் சட்டவிரோதமாகப் பிரித்தெடுத்ததாகக் கண்டறியப்பட்டது.
இதன் விளைவாக, இறையாண்மையைத் திரும்ப ஒப்படைக்க பிரித்தானியா கொள்கை அளவில் ஒப்புக்கொண்டது.
இந்த ஒப்பந்தத்தின் கீழ், அமெரிக்காவின் மிகப்பெரிய வெளிநாட்டு இராணுவத் தளங்களில் ஒன்றான டியேகோ கார்சியா அமைந்துள்ள பகுதியை மட்டும் பிரித்தானியா நீண்ட கால குத்தகைக்கு (Lease) எடுத்துக்கொள்ளும்.
இறையாண்மை மாற்றம் செய்யப்பட்டாலும், அமெரிக்காவுடனான குத்தகை உடன்படிக்கையின் கீழ் டியேகோ கார்சியா தளம் தொடர்ந்து இயங்கும் என்றும் அதில் எந்த மாற்றமும் இருக்காது என்றும் அதிகாரிகள் தெரிவித்துள்ளனர்.
இந்த முடிவை “மூலோபாய பலவீனம்” (Strategic weakness) என்று குறிப்பிட்டுள்ள ட்ரம்ப், அமெரிக்கா கிரீன்லாந்து (Greenland) போன்ற மூலோபாய முக்கியத்துவம் வாய்ந்த பகுதிகள் மீது அதிகக் கட்டுப்பாட்டைத் தேட வேண்டும் என்பதற்கு இதுவே உதாரணம் என்றும் கூறியுள்ளார்.
