இன்றைய நாட்களில் பலவித நோய்கள் புதிது புதிதாக உருவாக்கம் பெறுகிறது. இதே போல் பாலியல் ரீதியாக பரவக் கூடிய தொற்றுகள் என்பது ஒருவருடைய பாலியல் வாழ்க்கைக்கு தடை ஏற்படுத்தும் அளவுக்கு ஆபத்தானது. பாலியல் ரீதியில் பரவக் கூடிய தொற்றுகளை STI என்று குறிப்பிடுகின்றனர். எஸ்டிஐ ஏற்பட்டால் அதுகுறித்து வெளிப்படையாக பேசவும், மருத்துவரைப் பார்க்கவும் ஆண்கள் தயங்குகின்றனர்.
ஆனால், எஸ்டிஐ தொற்றுகள் என்பது மிக எளிமையாக ஒரு நபரிடம் இருந்து அவர்களின் வாழ்க்கை துணைக்கும் பரவக் கூடியது என்பதை நினைவில் கொள்ள வேண்டும். ஆக, ஒரு ஆணுக்கு தொற்று ஏற்பட்டால் அதை தொடக்கத்திலேயே கண்டறிந்து முறையான சிகிச்சை எடுத்துக் கொள்ள வேண்டும். அதற்கான அறிகுறிகள் மற்றும் தடுப்பு முறைகள் குறித்து இந்த தொகுப்பில் பார்க்கலாம்.
சிறுநீர் கழிக்கும்போது எரிச்சல்: ஆண்கள் சிறுநீர் கழிக்கும் போது ஏற்படக் கூடிய எரிச்சல் தான் எஸ்டிஐ-க்கான மிக முக்கியமான அறிகுறியாகும். பெண்களும் கூட இதேபோன்ற அறிகுறிகளை உணர நேரிடும். ஆண்களுக்கு இந்நோய் ஏற்பட்டால் அடிக்கடி சிறுநீர் கழிக்க வேண்டும் என்ற எண்ணமும், சிறுநீர் கழிக்கும்போது கடுமையான வலியும் ஏற்படும்.
ஆணுறுப்பில் இருந்து கசிவு: ஒரு ஆணுக்கு இந்நோய் இருக்கிறது என்பதற்கு மற்றுமொரு அறிகுறி அவரது ஆணுறுப்பில் இருந்து வெளிவரக் கூடிய தேவையற்ற கசிவுகள் ஆகும். இந்த கசிவு வாசமற்றதாக இருக்கலாம் அல்லது நிறமற்ற கசிவாகவும் இருக்கலாம். சில சமயம் இதுபோன்ற கசிவுகளில் கடுமையான துர்நாற்றம் வீசக் கூடும்.
பாலியல் உறவின்போது சிரமம்: இந்நோய் பாதித்த நபருக்கு பாலியல் உறவின்போது சில சிரமங்கள் மற்றும் அசௌகரியங்கள் ஏற்படும். குறிப்பாக விந்துவை வெளியேற்றுவதில் கடுமையான சிரமம் ஏற்படும். சிலருக்கு பாலியல் உறவு கொள்ள முடியாத அளவுக்கு கடுமையான வலி உண்டாகலாம்.
அடிவயிற்றில் கடும் வலி : சிலருக்கு காரணமே இல்லாமல் அடிவயிற்றில் கடும் வலி உண்டாகும். இது எதனால் ஏற்படுகிறது என்று தெரியாமல் குழப்பம் உண்டாகலாம். கிளமீடியா என்னும் பாதிப்பு ஏற்பட்டால் சிறுநீர் கழிக்கும்போது வலி உண்டாகும் மற்றும் துர்நாற்றத்துடன் கூடிய கசிவு வரும்.
அரிப்பு மற்றும் சிவந்த தடிப்பு: ஆண்களின் பிறப்புறுப்பு பகுதியில் அரிப்பு ஏற்படுவதும், அதனுடன் சிவந்த தடிப்புகள் உண்டாகுவதும் இதற்கான அறிகுறிகள் ஆகும். சிறுநீர் கழித்த பிறகு முறையாக சுத்தம் செய்யாமல் இருப்பது, அழுக்கான உள்ளாடைய அணிவது போன்ற காரணங்களால் இதுபோன்று உண்டாகலாம். இதுபோன்ற அறிகுறிகள் தெரிந்தால் தாமதம் செய்யாமல் மருத்துவரை அணுகி ஆலோசனை பெறலாம்.
தினமும் குளிக்கும்போது பிறப்புறுப்பு பகுதியை சோப் கொண்டு முறையாக சுத்தம் செய்ய வேண்டும். பாலுறவில் ஈடுபட்ட பிறகும் ஆணுறுப்பை முறையாக சுத்தம் செய்ய வேண்டும். இதையெல்லாம் செய்ய தவறும் பட்சத்தில் எஸ்டிஐ ஏற்படும் என்பதை கவனத்தில் கொள்ள வேண்டும்.
மேலும் பல செய்திகளை அறிந்து கொள்ள மின்னல்24 இணையத்தளத்தை பார்வையிடவும்
