ஐக்கிய நாடுகள் பொதுச்சபையின் வருடாந்த கூட்டத்தொடருக்காக உலக நாடுகளின் தலைவர்கள் நியூயோர்க்கில் கூடிவரும் நிலையில், அமெரிக்க ஜனாதிபதி டொனால்ட் ட்ரம்ப் மற்றும் பிரிட்டன் பிரதமர் ஆண்டி பர்ன்ஹாம் ஆகியோர் இன்று முதல் முறையாக நேரில் சந்திக்கவுள்ளனர். பர்ன்ஹாம் கடந்த ஜூலை மாதம் பிரிட்டன் பிரதமராக பதவியேற்ற பின்னர், இது அவரது முதல் முக்கிய சர்வதேச இராஜதந்திர நிகழ்வாகும்.
இரு தலைவர்களுக்கும் இடையிலான சந்திப்பில் உக்ரைன் போர், மத்திய கிழக்கு மோதல்கள் மற்றும் உலகளாவிய பாதுகாப்பு உள்ளிட்ட விவகாரங்கள் முக்கியமாக இடம்பெறும் என எதிர்பார்க்கப்படுகிறது. உக்ரைனுக்கு மேலதிக வான் பாதுகாப்பு ஏவுகணைகளை வழங்குமாறு ட்ரம்பிடம் பர்ன்ஹாம் கோரிக்கை விடுக்கக்கூடும் என தெரிவிக்கப்பட்டுள்ளது.
அதேவேளை, மத்திய கிழக்கில் நிலவும் மோதல்கள் மற்றும் ஹோர்முஸ் நீரிணை ஊடான கப்பல் போக்குவரத்து தொடர்பான பிரச்சினைகளும் பேச்சுவார்த்தையில் இடம்பெறலாம். பர்ன்ஹாம், அமெரிக்காவுடன் பொதுவான நிலைப்பாடுகளை உருவாக்குவதுடன், பிரிட்டனின் நலன்களுக்கு முரணான விடயங்களில் தனது நாட்டின் நிலைப்பாட்டை முன்வைக்கப் போவதாக கூறியுள்ளார்.
ஐ.நா. பொதுச்சபை கூட்டத்தொடரில் உக்ரைன், மத்திய கிழக்கு, காலநிலை மாற்றம் மற்றும் செயற்கை நுண்ணறிவு உள்ளிட்ட சர்வதேச முக்கியத்துவம் வாய்ந்த பல விடயங்கள் குறித்து உலகத் தலைவர்கள் கலந்துரையாடவுள்ளனர். ட்ரம்ப் ஒரே நாளில் பல நாடுகளின் தலைவர்களுடன் இருதரப்பு மற்றும் குழு சந்திப்புகளை நடத்தவுள்ளதாகவும் தெரிவிக்கப்பட்டுள்ளது.
