எத்தியோப்பிய அரசாங்கமும், வடக்கு டிக்ரே பிராந்தியத்தை கட்டுப்பாட்டில் வைத்துள்ள டிக்ரே மக்கள் விடுதலை முன்னணியும் (TPLF) தாங்கள் மீது எதிர்த்தரப்பு புதிய இராணுவத் தாக்குதலை ஆரம்பித்ததாக பரஸ்பரம் குற்றம்சாட்டியுள்ளன. இதனால், 2022ஆம் ஆண்டு முடிவுக்கு கொண்டுவரப்பட்ட டிக்ரே போர் மீண்டும் தீவிரமடைந்து, நாடு முழுவதும் பெரியளவிலான மோதல் ஏற்படக்கூடும் என்ற அச்சம் அதிகரித்துள்ளது.
டிக்ரே பிராந்தியத்தில் உள்ள விமான நிலையங்களை தமது படைகள் கைப்பற்றியுள்ளதாகவும், அண்டை பிராந்தியங்களான அஃபார் மற்றும் அம்ஹாராவில் அரசாங்கப் படையினரின் நிலைகளுக்கு எதிராக தாக்குதல்களை முன்னெடுத்துள்ளதாகவும் எத்தியோப்பிய அரசாங்க அதிகாரிகள் தெரிவித்துள்ளனர். அதேவேளை, டிக்ரே நிர்வாகம், அரசாங்கப் படைகளின் தாக்குதல்களுக்கு பதிலளிக்கும் வகையில் தமது படைகள் “தற்காப்புப் போர்” ஒன்றில் ஈடுபட்டுள்ளதாக கூறியுள்ளது.
2020 முதல் 2022ஆம் ஆண்டு வரை இடம்பெற்ற டிக்ரே உள்நாட்டுப் போரில் நூறாயிரக்கணக்கானோர் உயிரிழந்த நிலையில், ஆபிரிக்க ஒன்றியத்தின் மத்தியஸ்தத்தில் 2022 நவம்பரில் பிரிட்டோரியா சமாதான ஒப்பந்தம் கைச்சாத்திடப்பட்டது. எனினும், கடந்த சில மாதங்களாக இருதரப்பினரும் அந்த ஒப்பந்தத்தை மீறியதாக ஒருவரையொருவர் குற்றம்சாட்டி வந்தனர். இந்நிலையில், ஆபிரிக்க ஒன்றியமும் உடனடியாக பதற்றத்தை தணித்து நேரடி பேச்சுவார்த்தைக்கு திரும்புமாறு இருதரப்பினரையும் வலியுறுத்தியுள்ளது.
