இறக்குமதி மற்றும் ஏற்றுமதி அனுமதிப்பத்திரம் வழங்கியதன் ஊடாக கடந்த 2024ஆம் ஆண்டில் 3.7 பில்லியன் ரூபாயை வருமானமாக ஈட்டியுள்ளதாக இறக்குமதி மற்றும் ஏற்றுமதி கட்டுப்பாட்டுத் திணைக்களம் தெரிவித்துள்ளது.
இது 2023 ஆம் ஆண்டை விட 13% அதிகரிப்பு என இறக்குமதி மற்றும் ஏற்றுமதி கட்டுப்பாட்டுத் திணைக்களம் தெரிவித்துள்ளது .
கடந்த ஆண்டு 17ஆயிரத்து 010 இறக்குமதி மற்றும் ஏற்றுமதி அனுமதிப்பத்திரங்கள் வழங்கப்பட்டதாக தெரிவிக்கப்பட்டுள்ளது .
இதில் கையடக்க தொலைபேசிகள், தகவல் தொடர்பு சாதனங்கள் மற்றும் பிற உபகரணங்களை இறக்குமதி செய்வதற்கு அதிக எண்ணிக்கையிலான அனுமதிப்பத்திரங்கள் வழங்கப்பட்டுள்ளதாகக் கூறப்படுகிறது.
இரசாயன பொருள்கள், உரங்கள், பூச்சிக்கொல்லிகள் மற்றும் தொழில்துறை மூலப்பொருள்களின் இறக்குமதி மற்றும் ஏற்றுமதிக்கான உரிமங்களை வழங்குவதும் கடந்த வருடத்தில் அதிகரித்துள்ளதாக குறிப்பிடுகிறது .
2024 ஜூன் முதல் டிசம்பர் வரை கால்நடை தீவனத்தாக 3இலட்ச மெற்றிக் தொன் மக்காச்சோளத்தை உற்பத்தி செய்வதற்கான இறக்குமதி அனுமதிப்பத்திரம் வழங்குவதற்கும் அனுமதி வழங்கப்பட்டுள்ளது. இந்த காலப்பகுதிக்குள் 22ஆயிரத்து 22 இறக்குமதி அனுமதிப்பத்திரங்கள் வழங்கப்பட்டுள்ளதாக தெரிவிக்கப்படுகிறது .
இது 2023இல் வழங்கப்பட்டதை விடவும் அதிக எண்ணிக்கை என இறக்குமதி மற்றும் ஏற்றுமதி கட்டுப்பாட்டுத் திணைக்களம் குறிப்பிட்டுள்ளது.
இதற்கு மேலதிகமாக, உள்நாட்டு தேவைகளுக்காக 15ஆயிரம் மெட்ரிக் தொன் தோல் நீக்கப்பட்ட முந்திரி பருப்புகளை இறக்குமதி செய்வதற்கான அனுமதிப்பத்திரங்கள் வழங்கப்பட்டுள்ளன.
கடந்த ஆண்டு தேயிலை இறக்குமதிக்காக 687 அனுமதிப்பத்தரங்கள் வழங்கப்பட்டதாக செயல்திறன் அறிக்கையில் குறிப்பிடப்பட்டுள்ளது .
இது 2023 ஆம் ஆண்டை விட அதிகம் எனவும் சுட்டிக்காட்டப்பட்டுள்ளது.
