கட்டுமானப் பணிகள் காரணமாக கொழும்பு-கண்டி பிரதான வீதியின் ஒரு பாதை கடவத்தை அருகே தற்காலிகமாக மூடப்படும் என்று பொலிஸார் தெரிவித்தனர்.
கடவத்தை இடைமாற்றத்திலிருந்து மீரிகம நோக்கிச் செல்லும் 500 மீற்றர் வரையில் பாதை மூடப்படவுள்ளது.
கட்டுமானப் பணிகள் தற்போது நடைபெற்று வருவதால், பண்டாரவத்தை-புவக்பிட்டி பகுதியிலிருந்து கொழும்பு-கண்டி பிரதான வீதியின் ஒரு பகுதி எதிர்வரும் மார்ச் மாதம் 15 ஆம் திகதி வரை மூடப்படும் என தெரிவிக்கப்பட்டுள்ளது.
இந்த காலகட்டத்தில் போக்குவரத்து கட்டுப்பாடுகள் அமுலில் இருக்கும், மேலும் கொழும்பிற்குள் நுழையும் மற்றும் வெளியேறும் வாகன சாரதிகள் சிரமத்தைத் தவிர்க்க மாற்று வழிகளைப் பயன்படுத்துமாறு அறிவுறுத்தப்படுகிறார்கள்.
மாற்று பாதையாக, கடவத்தை புதிய நகர போக்குவரத்து விளக்குகளிலிருந்து அதிவேக நெடுஞ்சாலை அணுகல் சாலை வழியாக எல்தெனிய போக்குவரத்து விளக்கு சந்திப்பு வரை வாகனங்கள் பயணிக்க முடியும்.
