உற்பத்திச் செலவு அடிப்படையில் சோளத்திற்கான உத்தரவாத விலையை நிர்ணயிப்பது , அறுவடையை கொள்வனவு செய்வதில் அரசாங்கத்தின் தலையீடு மற்றும் இதற்கான பொருத்தமான வழிமுறையை உருவாக்குதல் ஆகியவற்றின் அடிப்படையில் விவசாயிகளின் கருத்துக்கள் மற்றும் பரிந்துரைகள் பரிசீலிக்கப்படும் என்று கமத்தொழில் கால்நடை வளங்கள் காணி மற்றும் நீர்ப்பாசன அமைச்சர் கே.டி. லால்காந்த தெரிவித்தார்.
சோள விவசாயிகளுடன் இன்று புதன்கிழமைகாலை ஜனாதிபதி அலுவலகத்தில் நடைபெற்ற கலந்துரையாடலின் போது அமைச்சர் மேற்கண்டவாறு தெரிவித்தார்.
உற்பத்திச் செலவின் அடிப்படையில் ஒரு கிலோ சோளத்தை குறைந்தபட்சம் 140 ரூபாவிற்கு கொள்வனவு செய்வது தொடர்பில் கவனம் செலுத்தப்படும் என்றும், விவசாயிகளின் செலவுகளைக் குறைப்பதன் மூலம் அதிக இலாபம் ஈட்டக்கூடிய வகையில் உற்பத்தி நடவடிக்கைகளை மேற்கொள்ள தேவையான சூழல் உருவாக்கப்படும் என்றும் அமைச்சர் தெரிவித்தார்.
தற்போதைய உற்பத்திச் செலவின் அடிப்படையில் ஒரு கிலோவிற்கு சோளத்தின் உத்தரவாத விலையை 135-140 ரூபாவை விட குறைப்பதன் மூலம் விவசாயிகள் சிரமப்படுவார்கள் என்று அமைச்சர் குறிப்பிட்டார். விலையை மேலும் அதிகரிப்பது கால்நடை உற்பத்தியாளர்கள் மற்றும் நுகர்வோருக்கு சிரமத்தை ஏற்படுத்தும் என்று அமைச்சர் சுட்டிக்காட்டினார்.
விவசாயிகளின் உற்பத்திச் செலவைக் குறைப்பது குறித்தும் இங்கு கவனம் செலுத்தப்பட்டது. இதற்காக உர மானியம் வழங்குவதில் கவனம் செலுத்தப்படும் என்று அமைச்சர் கே.டி. லால்காந்த தெரிவித்தார்.
மானியங்கள் தேவையில்லை என்றும், அவை முறைகேடுகளுக்கு வழிவகுக்கும் என்றும், அவை தங்களின் சுயாதீனமான மற்றும் வலுவான வளர்ச்சிக்குத் தடையாக இருக்கும் என்றும் சுட்டிக்காட்டிய விவசாயிகள், சந்தையில் இருந்து மானிய விலையில் உரங்களை வழங்குவதற்கான ஒரு வழிமுறையை உருவாக்க வேண்டும் என்று கோரிக்கை விடுத்தனர்.
மனித உழைப்பைக் குறைந்தபட்சமாகப் பயன்படுத்தக்கூடிய நவீன இயந்திரங்களை அறிமுகப்படுத்துதல், அதிக அறுவடையைத் தரும் உயர்தர விதைகளை அறிமுகப்படுத்துதல், அரச காணிகளில் பயிர்ச் செய்கை மேற்கொள்ளும் விவசாயிகளுக்கு பாதைகளை அமைத்தல், கமநலத் திணைக்களத்தின் தலையீட்டுடன் வயல்களைத் தயார்படுத்தத் தேவையான டிரெக்டர்கள் மற்றும் ஏனைய இயந்திரங்களை வழங்குதல் ஆகியவற்றின் மூலம் உற்பத்திச் செலவைக் குறைக்க முடியும் என்றும் இங்கு கருத்துத் தெரிவித்த விவசாயிகள் குறிப்பிட்டனர்.
மஹஇலுப்பல்லம கமநல ஆராய்ச்சி நிறுவனம் உயர்தர சோளத்தை உற்பத்தி செய்கிறது என்றும், இறக்குமதி செய்யப்பட்ட சோள விதைகளிலிருந்து பெறப்பட்ட அறுவடையை ஒத்த அறுவடையினை விவசாயிகள் பெற்றுள்ளனர் என்றும் விவசாயத் திணைக்கள சோளப் பயிற்செய்கை தொடர்பான பிரதானி கலாநிதி புத்திக நிஷாந்த அபேசிங்க இதன்போது தெளிவுபடுத்தினார்.
இறக்குமதி செய்யப்பட்ட விதைகளின் பயன்பாடு மற்றும் விவசாய உள்ளீடுகளின் பயன்பாடு அதிகரிப்பதால் உற்பத்தி செலவு அதிகமாக இருப்பதாக விவசாயிகள் சுட்டிக்காட்டினர். மஹஇலுப்பல்லம விவசாய ஆராய்ச்சி நிறுவனத்தால் உற்பத்தி செய்யப்படும் விதைகளின் அறுவடை, இறக்குமதி செய்யப்பட்ட விதைகளை விட சற்று குறைவாக இருந்தாலும், உற்பத்தி செலவு குறைவாக இருப்பதால் அந்த விதைகளின் தரத்தை மேலும் மேம்படுத்துவது பொருத்தமானது என்று விவசாயிகள் சுட்டிக்காட்டினர்.
சமர்ப்பிக்கப்பட்ட தகவல்களை மீளாய்வு செய்த பின்னர் சோளப் பயிர்ச் செய்கையை அதிகரிக்கவும் விவசாயிகளுக்கு தேவையான நிவாரணங்களை வழங்கவும் தேவையான நடவடிக்கைகள் எடுக்கப்படும் என்று அமைச்சர் கே.டி. லால் காந்த தெரிவித்தார்.
வர்த்தகம், வணிகம், உணவுப் பாதுகாப்பு மற்றும் கூட்டுறவு அபிவிருத்தி அமைச்சர் வசந்த சமரசிங்க, கமத்தொழில் மற்றும் கால்நடை வளங்கள் பிரதி அமைச்சர் நாமல் கருணாரத்ன, கமத்தொழில் கால்நடை வளங்கள், காணி மற்றும் நீர்ப்பாசன அமைச்சின் செயலாளர் டி.பி. விக்ரமசிங்க, விவசாயத் திணைக்கள பணிப்பாளர் நாயகம் துஷார விக்ரமாராச்சி, அமைச்சின் அதிகாரிகள் மற்றும் சோள விவசாயிகள் குழு இந்த கலந்துரையாடலில் பங்கேற்றனர்.
ஜனாதிபதி ஊடகப் பிரிவு
2025-11-26
