இலங்கையில் உருவாகியுள்ள டிட்வா புயல் தற்போது வாழைச்சேனைக்கும் பொலன்னறுவைக்கும் இடையில் மையம் கொண்டுள்ளதாக அறிவிக்கப்பட்டுள்ளது.
யாழ்ப்பாண பல்கலைக்கழக புவியியற்துறை சிரேஸ்ட விரிவுரையாளர் நாகமுத்து பிரதீபராஜா இதனை தெரிவித்துள்ளார்.
அத்துடன், இது தொடர்ந்து வடக்கு, வடமேற்கு திசை நோக்கி நகர்ந்து வருவதாகவும் அவர் தெரிவித்துள்ளார்.
நேற்று மாலை வரை மணிக்கு 18 கிலோ மீற்றர் வேகத்தில் நகர்ந்த இந்த புயல், தற்போது மணிக்கு 12 கிலோ மீற்றர் வேகத்தில் நகர்கின்றது.
நேற்றைய தினம் டிட்வா புயலின் மையச்சுழற்சி மணிக்கு 48 கிலோ மீற்றர் என்ற அளவில் காணப்பட்டது.
எனினும், இன்று பிற்பகல் வேளையில், நகர்வு வேகமும் மையச் சுழற்சியின் வேகமும் அதிகரிக்கும் என எதிர்பார்க்கப்படுகிறது.
இந்த டிட்வா புயல் முழுவதும் நிலப்பகுதியூடாகவே வடக்கு மற்றும் வடமேற்கு திசையில் நகர்ந்து நாளை பிற்பகல் முல்லைத்தீவு மாவட்டத்தின் அம்பலவன்பொக்கணை பகுதியூடாக வெளியேறும் என எதிர்பார்க்கப்படுகிறது.
இதனால் இன்றும் திருகோணமலை, முல்லைத்தீவு, வவுனியா, மன்னார், கிளிநொச்சி, யாழ்ப்பாணம், கண்டி, பொலன்னறுவை, அனுராதபுரம், புத்தளம், சிலாபம் குருநாகல், கொழும்பு மாவட்டங்களில் மிக கன மழை பெய்யும் என்றும் எச்சரிக்கை விடுக்கப்பட்டுள்ளது.
அத்துடன், நிலப்பகுதியின் ஊடாக நகர்ந்து வந்த டிட்வா புயல், நாளை கடற்பகுதிக்குள் வெளியேறும்போது வடக்கு மாகாணம் குறிப்பாக முல்லைத்தீவு, கிளிநொச்சி மற்றும் யாழ்ப்பாணம் மிகக் கனமழை பெய்யும் என எதிர்பார்க்கப்படுகிறது.
வடக்கு, வடமத்திய, மத்திய, வடமேல், சபரகமுவ மற்றும் மேல் மாகாணங்களில் சில இடங்களில் 200 மில்லி மீற்றருக்கும் அதிகமான மிக பலத்த மழையும் பெய்யும்.
திருகோணமலை, பதுளை, மட்டக்களப்பு, காலி மற்றும் மாத்தறை மாவட்டங்களில் சில இடங்களில் 150 மில்லி மீற்றருக்கும் அதிகமான மிக பலத்த மழை பெய்யக்கூடும் என எதிர்வுக்கூறப்பட்டுள்ளது.
இதனிடையே, இலங்கையில் நிலவும் மிக மோசமான வானிலை காரணமாக இன்று அதிகாலை நிலவரப்படி அதிகபட்ச மழைவீழ்ச்சி வவுனியா மாவட்டத்தில் உள்ள செட்டிக்குளம் பிரதேசத்தில் பதிவாகியுள்ளது.
அதற்கமைய, அங்கு 315 மில்லிமீற்றர் கன மழை பெய்துள்ளதாக வளிமண்டலவியல் திணைக்களம் தெரிவித்துள்ளது.
அத்துடன், முல்லைத்தீவு மாவட்டத்தில் உள்ள அளம்பில் பிரதேசத்தில் 305 மில்லிமீற்றர் மழைவீழ்ச்சியும் கண்டி மாவட்டத்தில் 223.9 மில்லி மீற்றர் கன மழையும் பதிவாகியுள்ளது.
அதன்படி, இலங்கையில் நிலவும் கன மழை மற்றும் பலத்த காற்று நிலைமை மேலும் மோசமடையலாம் என்றும் வளிமண்டலவியல் திணைக்களம் எச்சரித்துள்ளது.
இதேவேளை, இன்று மாலை முதல் மட்டக்களப்பு, அம்பாறை, ஹம்பாந்தோட்டை, காலி, மாத்தறை, மொனராகலை, பதுளை மாவட்டங்களில் படிப்படியாக மழை குறைவடையும் என்றும் எதிர்பார்க்கப்படுகின்றது.
அத்துடன், நாளை காலை முதல் நுவரெலியா, இரத்தினபுரி, கேகாலை, கண்டி, கொழும்பு மாவட்டங்களிலும் நாளை நள்ளிரவு முதல் திருகோணமலை, வவுனியா, மன்னார் அநுராதபுரம் புத்தளம் மாவட்டங்களில் மழை குறைவடையும் என்று எதிர்பார்க்கப்படுகின்றது.
இதனால், மக்கள் அதற்கேற்ற வகையில் தம்மைத் தயார்ப்படுத்தி, அதிதீவிரமான வானிலையினால் ஏற்படும் பாதிப்புக்களை குறைத்துக்கொள்ள முடியும் என்றும் வளிமண்டலவியல் திணைக்களம் அறிவுறுத்தியுள்ளது.
