10 விருதுகளை அள்ளிக் குவித்துள்ள மஞ்சுமல் பாய்ஸ் திரைப்படம்

2024 ஆம் ஆண்டுக்கான கேரள அரசின் திரைத்துறைக்கான விருதுகள் அறிவிக்கப்பட்டுள்ளன.

இதில் மஞ்சுமல் பாய்ஸ் திரைப்படம் விருதுகளை அள்ளிக் குவித்துள்ளது.

மஞ்சுமல் பாய்ஸ் திரைப்படம் கடந்த ஆண்டு வெளியாகி மிகப்பெரும் வரவேற்பை இந்திய அளவில் பெற்றது.

கொடைக்கானலுக்கு சுற்றுலா சென்ற மஞ்சுமல் பாய்ஸ் குழுவில் ஒருவர் குகை பள்ளத்தாக்கில் சிக்கிவிட அவர்களை நண்பர்கள் மீட்பதுதான் படத்தின் கதை.

மிகவும் விறுவிறுப்பான திரைக்கதை அமைப்பில் வெளிவந்த இந்த திரைப்படம் ரசிகர்களுக்கு புது வித அனுபவத்தைக் கொடுத்தது.

இந்த நிலையில் 2024 ஆம் ஆண்டுக்கான கேரள அரசின் திரைத்துறைக்கான விருதுகளில் 10 விருதுகளை மஞ்சுமல் பாய்ஸ் திரைப்படம் தட்டிச் சென்றுள்ளது.

சிறந்த இயக்குனராக மஞ்சுமல் பாய்ஸின் இயக்குனர் சிதம்பரம், சிறந்த திரைக்கதைக்காக இயக்குனர் சிதம்பரம் என 2 விருதுகள் அவருக்கு அறிவிக்கப்பட்டன.

சிறந்த கேரக்டர் நடிகருக்காக சவுபின் சாகிர், சிறந்த கலை இயக்குனருக்காக அஜயன் சாலசேரி, சிறந்த ஒளிப்பதிவுக்காக சைஜு காலித், சிறந்த ஒலி வடிவமைப்புக்காக சிஜின் ஹட்டான், அபிஷேக் நாயர், சிறந்த ஒலி கலவை பசல் பக்கர், சிஜின் ஹட்டான், சிறந்த கலரிஸ்ட் ஸ்ரிக் வாரியர், சிறந்த பாடலாசிரியர் வேடன் ஆகியோர் மஞ்சுமல் பாய்ஸ் படத்திற்காக விருதுகளைப் பெறுகின்றனர்.