ஒரு திரைப்படம் 30 ஆண்டுகளாக தொடர்ந்து திரையரங்கு ஒன்றில் திரையிடப்பட்டு வருகிறது. அந்தப் படத்துக்கான எதிர்பார்ப்பு இன்றைய தலைமுறையிடமும் குறையவில்லை.
அதே சமயம் அந்த திரையரங்கில் டிக்கெட் விலை ரூ.50 மற்றும் ரூ.30 தான். பெண்மணி ஒருவர் தினமும் வந்து அந்தப் படத்தைப் பார்த்துச் செல்கிறாராம். அவருக்கு டிக்கெட் இலவசமாம்.
அந்தப் படம் தான் ஷாருக்கான் நடிப்பில் கடந்த 1995 ஆம் ஆண்டு அக்டோபர் மாதம் 20 ஆம் திகதி திரையரங்குகளில் வெளியான ‘தில் வாலே துல் ஹனியா லே ஜாயேங்கே’.
ஆதித்யா சோப்ரா இயக்கத்தில் யாஷ் சோப்ரா தயாரிப்பில் வெளியான இந்தப் படத்தில் கஜோல் நாயகியாக நடித்துள்ளார்.
அம்ரீஷ் புரி, ஃபரிதா ஜலால், அனுபம் கெர், கரண் ஜோஹர் உள்ளிட்ட பலர் நடித்துள்ளனர்.அந்தக் காலத்தில் ரூ.4 கோடியில் உருவான இந்தப் படம் ரூ.100 கோடியை வசூலித்ததாகக் கூறப்படுகிறது.
‘தில்வாலே துல்ஹனியா லேஜாயேங்கே’ திரைப்படம் வெளியாகி நேற்றுடன் 30 ஆண்டுகளைக் கடந்துள்ளது.
ஆனாலும், இன்றும் மும்பையில் உள்ள மராத்தா மந்திர் என்ற திரையரங்கில் படம் ஓடிக்கொண்டிருக்கிறது.
ஒரு படம் தொடர்ந்து 30 ஆண்டுகளாக ஓடிக்கொண்டிருப்பது இரசிகர்களுக்கு ஆச்சரியத்தை ஏற்படுத்தியுள்ளது.
இதில் மற்றொரு விடயம் என்னவென்றால் 2015 ஆம் ஆண்டு படத்தை நிறுத்த திரையரங்கு நிர்வாகம் திட்டமிட்ட நிலையில், இரசிகர்கள் எதிர்ப்பு காரணமாக தொடர்ந்து திரையிடப்பட்டு வருவது குறிப்பிடத்தக்கது.
