வறுமையைக் குறைத்து நாடு முழுவதும் தேங்காய் நடுகையை ஊக்குவிக்கும் நோக்கில்இ வீட்டுத் தோட்ட நடுகைக்காக 500,000 தென்னை மரக்கன்றுகளை விநியோகிக்கும் தேசிய திட்டம் இன்று ஞாயிற்றுக்கிழமை காலை அம்பாறை, உஹனவில் ஆரம்பிக்கப்பட்டது.
இந்தத் திட்டத்தின் கீழ், வடக்கு தென்னை முக்கோணத்தில் உள்ள ஐந்து மாவட்டங்களான யாழ்ப்பாணம், கிளிநொச்சி, முல்லைத்தீவு, மன்னார் மற்றும் வவுனியா தவிர, இலங்கையின் அனைத்து மாவட்டங்களிலும் உள்ள 250,000 பயனாளி குடும்பங்களுக்கு 500,000 தென்னை மரக்கன்றுகள் இலவசமாக விநியோகிக்கப்படவுள்ளது.
இந்த நிகழ்வு பெருந்தோட்ட மற்றும் சமூக உள்கட்டமைப்பு அமைச்சர் சமந்த வித்யாரத்ன மற்றும் கிராமப்புற மேம்பாடு, சமூகப் பாதுகாப்பு மற்றும் சமூக வலுவூட்டல் பிரதி அமைச்சர் வசந்த பியதிஸ்ஸ ஆகியோரின் தலைமையில் நடைபெற்றது.
கிராமப்புற மேம்பாடு, சமூகப் பாதுகாப்பு மற்றும் சமூக வலுவூட்டல் அமைச்சுக்கும் தோட்டக்கலை மற்றும் சமூக உள்கட்டமைப்பு அமைச்சுக்கும் இடையே சமீபத்தில் கையெழுத்தான புரிந்துணர்வு ஒப்பந்தத்தைத் தொடர்ந்து இந்த முயற்சி மேற்கொள்ளப்பட்டது.
